YAP Xətai rayon təşkilatının yeni ərazi partiya təşkilatı yaradılıb
Sıralarında 18 min üzvü birləşdirən YAP Xətai rayon təşkilatının ərazi partiya təşkilatlarının say tərkibi genişlənir. Belə ki, martın 1-də bu tərkibə Yusif Səfərov küçəsi 27 ünvanında yaradılan “Elm” ərazi partiya təşkilatı daxil olub.
Yeni yaradılan ərazi partiya təşkilatına gələcək fəaliyyətində uğurlar arzulayan YAP Xətai rayon təşkilatının sədri Vüqar Rəhimzadə bu gün sıralarında 800 minə yaxın üzvü birləşdirən Yeni Azərbaycan Partiyasının keçdiyi çətin və şərəfli yoldan bəhs edib: “Ulu öndər Heydər Əliyevin yaradıcısı olduğu Yeni Azərbaycan Partiyası son 18 ildən artıq dövrdə möhtərəm Prezidentimiz İlham Əliyevin rəhbərliyi ilə uğurla inkişaf edir, yeni-yeni hədəflərə doğru inamla addımlayır. Yeni Azərbaycan Partiyasının ötən il martın 5-də tarixi Zəfərimizin reallıqları fonunda keçirilən VII qurultayında dövlət başçısı, YAP Sədri İlham Əliyev bu il 30 illik yubileyini qeyd edəcək partiyanın keçdiyi inkişaf yolundan geniş bəhs edərək qarşıdakı dövr ərzində görüləcək işləri diqqətə çatdırmışdır. Dövlət başçısının proqram xarakterli çıxışı hər bir partiya üzvünün qarşısında mühüm vəzifələr qoyur. YAP Sədri İlham Əliyevin VII qurultayda verdiyi tapşırığa əsasən partiyanın yeni proqramı təsdiqlənib. Yeni proqramda günümüzün əsas çağırışlarından olan işğaldan azad edilmiş ərazilərimizdə bərpa və quruculuq işlərinin həyata keçirilməsi, soydaşlarımızın Böyük Qayıdışının gerçəkləşməsi öz əksini tapıb. Həmin proqramda Yeni Azərbaycan Partiyasının hədəfləri və onlara nail olmağın mexanizmləri də qeyd olunub. Bu mühüm məqam bir daha vurğulanır ki, Azərbaycanı daim inkişafa aparan Heydər Əliyev yolu Prezident İlham Əliyev tərəfindən uğurla davam etdirilərək Azərbaycan xalqına tarixi Zəfərimizin sevincini yaşatdı. Yeni Azərbaycan Partiyasının əsas hədəflərindən biri məhz Heydər Əliyev irsinin təbliği və təşviqidir.”
Vüqar Rəhimzadə vurğulayıb ki, hər dövrün, zamanın öz tələbləri vardır. Yeni Azərbaycan Partiyası daim yeniləşməyə, təkmilləşməyə xüsusi önəm verir. Partiyanın dəyişməz prinsipləri, sözlə əməl birliyi onu cəmiyyətin avanqard qüvvəsinə çevirib. Ulu öndər Heydər Əliyevin “Yeni Azərbaycan Partiyası dünənin, bu günün və gələcəyin partiyasıdır” tezisinin davamı olaraq Prezident İlham Əliyevin “YAP nəinki ölkənin, Cənubi Qafqazın güclü siyasi təşkilatıdır” fikirləri yarandığı gündən ümumxalq partiyası adını qazanan Yeni Azərbaycan Partiyasına olan inam və etimadın göstəricisidir.
Sonra təşkilati məsələyə baxılıb. Mehriban İmanova “Elm” ərazi partiya təşkilatının sədri, Toğrul Quliyev isə sədr müavini seçiliblər.
